Шатдаун осымен аяқталды

Өткен сәрсенбі АҚШ-тағы маңызды саяси-экономикалық оқиғаны – шатдаунның аяқталуын күтумен өтті. АҚШ тарихындағы ең ұзақ «үкіметсіз» кезеңнің аяқталатынына бәрі де нық сенімді болды. Бұл жағымсыз жағдайдың аяқталуы нарық қатысушылары үшін қосымша оптимизм белгісі болды. Алайда сауда жабылғаннан кейін мынадай жаңалық белгілі болды: АҚШ президенті Дональд Трамп Уолл-стриттің топ-менеджерлері мен Джейми Даймонмен кешкі асынан соң үкімет жұмысының ең ұзақ тоқтап тұру кезеңіне нүкте қойған заңға қол қойды.

43 күнге созылған үкімет жұмысының тоқтауы инвесторлар мен саясаткерлер АҚШ экономикасының жағдайын бағалау үшін пайдаланатын маңызды деректердің қайта жариялануына жол ашады деп күтілуде. Бірақ мемлекеттік қызметтердің толыққанды жұмысы қаншалық жылдам қалпына келетіні әзірге белгісіз. Қазіргі таңда макроэкономикалық мәліметтердің жариялануы нарық күн тәртібінде бірінші орында тұр, ал жұмыспен қамту жөніндегі есеп осы қатардағы алғашқы индикаторлардың бірі болмақ. Инвесторлар бұл деректердің жақында алынған жеке сектор сауалнамаларындағы әлсіз көрсеткіштерден кейін мөлшерлемені одан әрі төмендету туралы нарық үмітін қолдайтынын күтіп отыр.

Қалай болғанда да, кеше өткен сауда күні шатдаунның аяқталуымен ерекшеленді. Әдетте артта қалатын Dow Jones индексі нарықты қуантты: ол 0,68% өсіп, биылғы жылы 17-ші рет тарихи максимумын жаңартты. Қалған екі жетекші америкалық индекс анағұрлым әлсіз нәтиже көрсетті. S&P 500 индексі символикалық 0,06% өсім көрсетті, ал жоғары технологиялық компаниялардың индексі NASDAQ Composite 0,28% төмендеді. Бұл соңғы күндері байқалып отырған — жоғары технология және жасанды интеллект секторларына қатысты инвесторлардың салқындауының жалғасы.

Ұқсас жағдай ITS индекс тобы ішінде де байқалды: ITS World (ITSW) жаһандық компаниялар индексі күнді 0,41% жоғалтумен жапты, ал ITS Shariah (ITSS) исламдық қағаздар индексі 1,29% өсім көрсетті. ITSS өсімін негізінен жетекші технологиялық компаниялардың бірі — Advanced Micro Devices Inc. (AMD) акцияларының айтарлықтай көтерілуі қамтамасыз етті. Чип өндіруші компания қаржылық аналитиктер күніне арналған іс-шарада болашаққа зор үміт ұялататын өсу стратегиясын жариялағаннан кейін, сәрсенбіде AMD акциялары 9% қымбаттады.

Алдыңғы қатарлы жартылай өткізгіш өндірушісі ретінде AMD келесі 3–5 жылда жылдық кірісін 35%-дан жоғары деңгейде өсіруді жоспарлап отыр. Бұған деректерді өңдеу орталықтары бизнесінің жыл сайын 60% ұлғаюы ықпал етпек. 2026 жылдың үшінші тоқсанынан бастап MI450 үлкен жадты графикалық процессорлары бар болашақ Helios жүйелері гиперскейлерлер мен өзге де клиенттерге жоғары өнімділік ұсынады. AMD сондай-ақ серверлік процессорлар нарығының жартысынан көбін иеленуді көздеп отыр: қазіргі шамамен 40% көрсеткішті EPYC сериялы қуатты процессорларының жоғары сатылымы есебінен ұлғайтуды жоспарлап отыр.

Сонымен қатар, AMD өзінің түзетілген операциялық маржасы қазіргі 24% деңгейінен шамамен 35%-ға дейін өседі деп күтіп отыр. Ал менеджмент бір акцияға шаққандағы пайданы $20-дан жоғары деңгейге жеткізуге болатынын мәлімдеді. Көрсетілген бұл деректер өте оптимистік және инвесторларды AMD акцияларын белсенді түрде сатып алуға ынталандырды.

Жалпы алғанда, нарықтағы ахуал біршама тыныш және қалыпты оптимистік күйде қалып отыр. Индекстер баяу болса да, тұрақты түрде жоғары қарай жылжуда. Инвесторлар алдағы екі аптадан кейін болатын Алғыс айту күнін толық дайындықпен қарсы алуға әзір, және дәл осы мереке жыл соңына дейінгі нарық бағытын айқындайтын кезең болмақ.

 

 

13 қарашаға нарық болжамдары

Бейсенбі күнгі сауда позитивті көңіл-күймен басталды. Әлемдік қор нарықтарының басым бөлігі «жасыл аймақта». Өсу көлемі аса үлкен емес, бірақ жеткілікті сенімді: орта есеппен әлемдік индекстер бүгін 0,3–0,5% шамасында қосып тұр.

Мұндай көңіл-күйдің негізгі себебі – АҚШ президенті Дональд Трамп мемлекеттік шығындар пакетін мақұлдап, ұзаққа созылған шатдаунды аяқтауы. Инвесторлар үкімет жұмысының тоқтауына байланысты кешіктірілген макроэкономикалық деректер легіне дайындалуда. Дегенмен Ақ үй қазан айына қатысты маңызды көрсеткіштер мүлдем жарияланбауы мүмкін екенін алдын ала ескертті.

Нарықтағы бүгінгі оң атмосфераға тағы бір себеп – кешегі сауда жабылғаннан кейін жарияланған технологиялық сектордың маңызды компаниясы Cisco Systems (CSCO) ұсынған тоқсандық есеп. Жарияланымнан кейін Cisco акциялары 6%-дан астамға өсті. Инвесторларға компанияның қаржылық көрсеткіштері ғана емес, басшылықтың алдағы жылдарға берген болжамдары да ұнады.

Жасанды интеллект саласындағы бум салдарынан деректерді өңдеу орталықтарын кеңейту үшін қажетті жабдықтарға сұраныстың күрт артуына сүйенген компания 2026 қаржы жылындағы кірісін 60,2–61 млрд АҚШ доллары көлемінде болжайды (бұған дейін 59–60 млрд доллар деп күтілген). Сондай-ақ түзетілген бір акцияға шаққандағы пайда 4,08–4,14 доллар деңгейінде болады деп күтілуде (бұрынғы болжам: 4,0–4,06 доллар).

Бұған қоса, бірінші тоқсан көрсеткіштері Уолл-стриттің күткенінен жоғары шыққан Cisco биылғы жылы ЖИ-инфрақұрылымынан 3 млрд доллар кіріс күтіп отыр.

Осындай оптимистік болжамдар Cisco акцияларының бағасына ғана емес, жалпы нарыққа, ең алдымен NASDAQ индексіне оң әсер етті. Бейсенбі таңында NASDAQ фьючерстері бірнеше ондық пайыздық өсім көрсетті. Бұл өсім негізгі сауда сессиясына жетеді ме – әзірге белгісіз, бірақ нарықтың қалыпты көтерілуіне белгілі бір мүмкіндік бар.

Негізгі сауда сессиясы аяқталғаннан кейін инвесторлар тағы бір маңызды компания – жартылай өткізгіштер өндірісіне арналған жабдықтар жеткізушісі Applied Materials Inc. (AMAT) тоқсандық есебін күтеді. Cisco-дан кейін AMAT та жақсы нәтижелер көрсетеді деген үміт бар, бұл да нарықты қолдап тұрады.

Дегенмен тым қарқынды өсім күтуге болмайды. Нарық өссе де, баяу және сақтықпен жылжуы ықтимал. Қазір байқалып отырған жағдай – өсімнен гөрі ағымдағы деңгейлерде орнығу кезеңі. Өйткені индекстер биыл тым жоғары көтерілді, ал инвесторлар қол жеткізілген нәтижені жоғалтып алудан қауіптеніп отыр.

Сондықтан асықпаймыз…және позицияны бекіте береміз.