2025 жылдың 30 маусымындағы сауда қорытындылары

Айдың және тоқсанның соңы сарапшылар болжаған жоспарға толық сәйкес өтті. Америкалық нарықтың негізгі бенчмаркі – S&P 500 индексі мен жоғары технологиялық компаниялардың NASDAQ Composite индексі дүйсенбі күні жабылу кезінде жаңа тарихи максимумға жетіп, соңғы бір жылдан астам уақыт ішіндегі ең үздік тоқсанды аяқтады. Бұл нәтижеге сауда келісімдеріне үміт пен пайыздық мөлшерлемелерді төмендету ықтималдығы себеп болды – инвесторлар арасындағы белгісіздік азайды.

Аталған екі индекс тоқсанды екі таңбалы өсіммен аяқтады. S&P 500 осы кезеңде +10,57%, ал Nasdaq одан да жоғары +17,75% көрсеткіш көрсетті. Ал дәстүрлі Dow Jones индексі оларға қарағанда баяуырақ өсіп, тоқсан ішінде +4,98% ғана қосты.

Десек те, соңғы тоқсандағы әсерлі өсімге қарамастан, үш негізгі америкалық индекс те 2022 жылдан бергі ең әлсіз жартыжылдық нәтижелерін көрсетті. Бұл – сауда саясатына қатысты белгісіздіктің салдары. Инвесторлар биыл бойын сақ ұстауға мәжбүр болды, ал жағдай 2 сәуірде президент Дональд Трамп кең көлемдегі тарифтер туралы жариялағаннан кейін шиеленісе түсті.

Қазіргі уақытта Қытай және Ұлыбританиямен арадағы сауда келісімдері толыққанды жаһандық сауда соғысының алдын алуға үміт сыйлап отыр. Президент Трамп бекіткен 9 шілде – соңғы мерзімге дейін бірқатар келісім жасалады деген сенім бар.

Америкалық индекстермен қатар ITS индекстер тобы да II тоқсанда жақсы табыс көрсетті. ITS World (ITSW) жаһандық компаниялар индексі тоқсан ішінде +7,44% өсті, ал жыл басынан бері +9,83% өсті. ITS Shariah (ITSS) ислам қағаздары индексі одан да жоғары көрсеткішке қол жеткізді – II тоқсан ішінде +15,25%, ал жыл басынан бері +5,37%. Байқағанымыздай, ITS индексі тобы америкалық әріптестерінен кем емес нәтиже көрсетіп отыр.

Ал дүйсенбі күнгі сауда қорытындысына келсек, жалпы жағдайды ITSS индексіндегі үш үздік компания жақсы сипаттайды. Олар: Oracle (ORCL), Broadcom (AVGO) және Apple (AAPL). Міне, нарықты алға сүйреп келе жатқан ірі технологиялық алпауыттар – осылар. Өткен аптада технологиялық компаниялардың акциялары үздік болды, қазір де дәл солай.

Бүгін технологиялық сектормен бәсекелес болуға қаржы секторының акциялары тырысты – олар орта есеппен +0,73%, ал технологиялық сектор +0,86% өсті. Дегенмен технологиялық алыптармен бәсекелесу оңай емес. Қаржы секторының акцияларына сұраныстың артуына себеп – ірі банктердің дағдарыстан сәтті өтуі. Бұл жаңа есеп беру маусымы қарсаңында (ол екі аптадан кейін басталады) банктердің акцияларын инвестициялық портфельге қосу үшін жақсы ынталандыру болып саналады.

Жалпы алғанда нарық қатысушылары дүйсенбі күнгі сауда қорытындыларына толық қанағаттануы тиіс. Есеп беру кезеңі максимум көрсеткішпен жабылды және бұл алдағы өсуге мықты іргетас болуы мүмкін.