Naryk.kz: Нарыққа апталық шолу: нақты сектор оң серпін көрсетті

Көп жағдайда ірі технологиялық компаниялардың акциялары нарықтағы негізгі өсім драйвері саналады. Дәл осы компанияларға деген сұраныс биржалық индекстерді жаңа биіктерге шығарып, тарихи максимумдарды жаңартуға себеп болып отыр. Алайда кейінгі апталардың қорытындысы бойынша үздік 10 акцияның қатарында бірде-бір технологиялық компания жоқ. Бұл жағдай бірнеше апта қатарынан байқалып келеді, деп жазады нарыққа апталық шолуында ITS биржасы сарапшылары.

Мұның себебі — үшінші тоқсанның корпоративтік есеп беру маусымы. Компаниялар өз нәтижелерін жариялағаннан кейін олардың акциялары ірі технологиялық бизнестердің салыстырмалы түрде баяу өсімінен жоғары қарқынмен көтеріліп жатыр. Өткен аптадағы ТОП-10 акцияның тоғызы есеп жариялағаннан кейін өскен. Демек, дәл қазір нарықтағы қозғалысты айқындап отырған басты фактор — тоқсандық есептер.

Бір компанияның акциясы есептен кейін күрт өскені оның бұрын дұрыс бағаланбағанын да көрсетуі мүмкін. Мұндай жағдай инвесторларға шағын әрі әлеуеті бар компанияларға назар аударуға мүмкіндік береді.

Мысалы, өткен аптаның көшбасшысы — Intuitive Surgical Inc (ISRG). Компанияның капитализациясы бір аптаның ішінде шамамен 50 млрд долларға артты. Intuitive Surgical — урология, гинекология, жүрек және кеуде қуысы хирургиясында қолданылатын роботтандырылған хирургияның пионері. Компанияның табысы оның ерекше медициналық жабдықтарында, жоғары дайындықтағы мамандар жүйесінде және техникалық қызмет көрсетудің тиімді жүйесінде. Роботталған хирургияға жаһандық сұраныс әлі де жоғары, ал Intuitive жыл сайын жүйе сатылымдарын 20% шамасында арттырып келеді.

Автокөлік секторындағы оң серпін

Инвесторларды биылғы тоқсанда General Motors (GM) және Ford Motor Company (F) компаниялары қуантты. Екеуі де үшінші тоқсанда табыс пен ақшалай ағын бойынша жақсы нәтиже көрсетті. GM 2017 жылдан бері алғаш рет АҚШ-та нарық үлесінің ең жоғары көрсеткішіне қол жеткізді.

АҚШ-та жаңа көліктерге сұраныс жоғары бағаларға қарамастан өсіп отыр. Дегенмен, автосектор үшін жыл оңай болған жоқ: АҚШ-тың импорттық тарифтері мен электромобиль нарығындағы баяулау көптеген компанияларға әсер етті. GM электромобиль бағытында 1,6 млрд доллар шығын есепке алып, бұл сектордан күткен пайда деңгейіне жете алмайтынын мойындады.

Ford жағдайы тұрақтырақ көрінеді. Компания келесі буындағы электромобиль платформасы бойынша прогресс бар екенін және Ford Pro бөлімшесіндегі төлемді бағдарламалық қамтамасыз етуге жазылу саны 8% өсіп, 818 мыңға жеткенін хабарлады. Дегенмен, Model e бағытына инвестициялар әлі де шығынды, бірақ басшылық сұраныс пен шығындарды бақылауға қатысты сенімді ұстаным білдірді. Нәтижесінде екі компанияның да есептерін нарық оң қабылдап, акцияларына сұраныс артты.

Әуе-ғарыш және қорғаныс секторындағы өсім

Апта ішіндегі тағы бір айтарлықтай өсім — RTX (Raytheon Technologies) компаниясына тиесілі. Үшінші тоқсан бойынша жақсы нәтиже және жылдық болжамның жоғарылауы оның акцияларын бір аптада 15% қымбаттатты.

RTX үш негізгі бағытта — коммерциялық авиадвигательдер, аэроғарыштық жобалар және қорғаныс тапсырыстарында — бірдей жақсы нәтиже көрсетті.

Pratt & Whitney бөлімшесі коммерциялық әуе қозғалтқыштарын техникалық қызмет көрсету бойынша жоғары сұранысты байқап отыр. Компания бұл бағыттағы жылдық сатылым болжамын да ұлғайтты.

Collins Aerospace те Airbus және Boeing секілді ірі өндірушілердің өндірісін арттыруынан пайда көріп отыр. Осыған байланысты бөлімшенің пайда күту көрсеткіші 275 млн доллардан 350–375 млн долларға көтерілді.

Raytheon қорғаныс бөлімшесі де табыс болжамын 400–450 млн долларға дейін ұлғайтты.

RTX-тің осындай тұрақты нәтижелері авиациялық және қорғаныс салаларының 2026 жылға қарай да оң траекторияда болатынын көрсетеді.

Қорытындылай келгенде, технологиялық алыптар нарықтың жалпы бағытын сақтап тұрса да, соңғы апталарда өсімнің басты көзі — есепті кезең нәтижелері мен нақты сектор компанияларының жетістіктері болып отыр.